Në kuadër të përmbylljes së projektit “Të rinjtë kundër korrupsionit”, i financuar nga Agjencia për Mbështetjen e Shoqërisë Civile (AMSHC), Instituti Shqiptar për Çështje Publike (AIPA) ka realizuar një nga aktivitetet e fundit dhe më konkrete të tij: vendosjen e “Kutive të Transparencës” në shkollat e mesme të përfshira në projekt.
Në 10 shkolla të mesme në qytetet Tiranë, Fier, Pogradec, Sarandë, Dibër, Mat, Durrës, Kukës, Lushnje dhe Prrenjas, janë vendosur “Kutitë e Transparencës” si një mekanizëm simbolik dhe praktik për të inkurajuar të rinjtë të shprehin shqetësimet, mendimet dhe rastet e mundshme të padrejtësive apo korrupsionit në mjedisin e tyre shkollor.
Këto kuti shërbejnë si një hapësirë e sigurt dhe anonime, ku nxënësit mund të denoncojnë fenomene negative, të propozojnë ide për përmirësim dhe të kontribuojnë në ndërtimin e një kulture transparence dhe llogaridhënieje. Përmes këtij mekanizmi, projekti synon të nxisë reagimin qytetar dhe të forcojë ndjenjën e përgjegjësisë tek të rinjtë për të mos qëndruar indiferentë përballë padrejtësive.
Vendosja e “Kutive të Transparencës” është shoqëruar me sesione informuese me nxënësit, ku është theksuar rëndësia e integritetit, guximit qytetar dhe rolit aktiv që ata mund të luajnë në përmirësimin e komunitetit të tyre. Nxënësit janë inkurajuar të përdorin këtë mjet si një formë konkrete për të ngritur zërin e tyre dhe për të kontribuar në krijimin e një mjedisi më të drejtë dhe më transparent.
Ky aktivitet përfaqëson një hap të rëndësishëm në përmbylljen e projektit, duke krijuar një lidhje të drejtpërdrejtë midis ndërgjegjësimit dhe veprimit praktik. Përmes “Kutive të Transparencës”, të rinjtë jo vetëm informohen, por edhe angazhohen aktivisht në promovimin e vlerave demokratike dhe luftën kundër korrupsionit .
Përfundimi i këtij projekti shënon një tjetër kontribut të rëndësishëm në fuqizimin e të rinjve si aktorë të ndryshimit dhe në ndërtimin e një kulture qytetare më të përgjegjshme dhe transparente në shoqërinë shqiptare.
